اضهر حبك لاتخفي

الحبيب اللي تودّه صارحة إبحبك
ومشاعر كَلبك وعشكَك لاتخفيهة

صدّك لو سمع منّك كلامٍ زين
نيران الكَلب بيدة يطفّيهة

ومِن يعرف إبحبك وإهتمامك بيه
يسوّي الروح وردة وإلك يهديهة

ولو تهدي هدية بالمحبة إتشوف
تظل إباله ذكرى ويحتفظ بيهة

وبالك تخفي حبك يوم لو حبّيت
على المحبوب ترة مايسر تاليهة

ولا تسكت لو حبّيته للمحبوب
ترة هذي سكتّك تندم إعليهة

ولو ماعرف منّك إنّك إتحبة
محبتة إلّي إلك للغير ينطيهة