اسمع يا بوش ....

رسالة الى المجرم بوش
ليوهمك غرورك والوقاحة البيك
تبقى بالعراق وتغلك أبوابه
يلن هذا وطن بأحضانه ضم حسين
وأستشهد علي ساجد على ترابه
وطن علم الدنيا العلم والقانون
أول قلم خط حروف الكتابه
وطن بيه العشك مو مثل عدكم غاد
يكضي بليله وحده وينكر أحبابه
عدنا اللي يحب كاعه وي روحه تصير
من تعطش تشب النار بثيابه
يفرح بالمنيّه بساحة الميدان
مثل فرحة الرامي بصيد نشّابه
أنصحك عوف كاعي كاعي تطلب ثار
فاض الغيض بيهه وطفح خنيابه
كبل جربهه الأجمن ورجع يحصد شوك
وبعار الهزيمة ردّت أذنابه
صحيح سلاح عندك يضرب من بعيد
بس عدنا زلم تفرح بالطلابه
وصحيح جيوش عندك ضخمه بالتعداد
بس وكت المنازل كلها جذابه
هاي أرض النبوّه و أولياء الله
عــربـيـد الـيـجـيـهـه تــشـلّـع أنــيـابـه
نبــي أبـراهـيـم فـوكـاهـه وصـرخ عـالـنــار
بـــردت بــأمــر الله وخــضّــرت غــابــه
ويونس على جفهه اتلكته من الحوت
صارتله دوى وطيّبت ما صابه
أطلع من ثراهه لاتوج اعليك
بعد نار المواكد لسّه لهّابه
وبعد ديوان أبوي يهلّي بالخطّار
وبريحة الكهوه معطره شبابه
وبعد خيل المثنّى ابيتي مسروجات
والفقّار لسّه مخاصم كرابه
ولسّه من الرميثه شهود بالعشرين
والمكوار بعده اليرهب اطوابه
أنا فوك السواتر جبت عمري الفات
ذلّيت العدو ولعبت بأعصابه
وأنا بكل الشدايد مالوتني الريح
ولا دنّست روحي بجرم نهّابه
بيريتي على كصتي سجّلت تذكار
وبعد وشم الزناد العلى السبّابه
أنا بهلهولة أمّي أنكلب بركان
أكحم عالرصاص وموتي ما هابه
شلون أرضى أجنبي يغزي خدرهه بليل
ويمس ثوبهه ويملش العصّابه
وحك دم الشهاده الحنّه وجه الكاع
وحك شعب العراق وبخت شيّابه
وحك صرخة (عبير) الطاهره العذراء
وحك كبّة الهادي وحزن محرابه
إذا ما ترتحل بيك أنكلب زلزال
تشوف الما أظنك حاسب حسابه
أسويهه المدن كلهن عليك سيوف
وأخلّي الحوم منكم تشبع أسرابه
أشيّد من خوذكم سارية لبغداد
وأسوّي سلاحكم لأطفالي لعّابه
أبد ما خاب حر اليطرد الصيدات
ولا ضاعت حكوك اعليهه طلاّبه
وإذا بغداد نادت ثار يهل الثار
كل نخله ببلادي اتصير دبّابه

للامانه

منقول

تحياتي

للجميع

ــــــــــــــــــــــــــــــــــــــ

يلن هذا وطن بأحضانه ضم حسين
وأستشهد علي ساجد على ترابه

شكرا لك اخي العزيز روميو ذبت مع كل كلمة بهذه القصيدة وامتزجت مشاعري بحروفها كم هي رائعة وكم هي وطنية وثورية شكرا لك على النقل الرائع وتقبل مروري

شكرا امهند على رد الجميل نورت الصفحه
دمت بخير ياوجه الخير ـ ـ ـ

عاشت ايدك روميوو على هذه القصيده مع تحياتي